Kauphöllin hefur undanfarið leitast við að samræma venjur á íslenska skuldabréfa- og víxlamarkaðnum við venjur sem viðhafðar eru á öðrum helstu mörkuðum. Tilgangur samræmingarinnar er einna helst að samstilla viðskiptahætti aðila markaðarins og jafnframt auðvelda innkomu erlendra fjárfesta. Kauphallaraðilar hafa komið því á framfæri við Kauphöllina að þeir telji til vansa hversu lítil samræming er á útreikningi á dagvísitölu neysluverðs- og lánskjaravísitölu til verðtryggingar, og uppgjörsverði (dirty price) afleiddu af hreinu verði (clean price) og þá sérstaklega að markaðsaðilar skuli eigi nota sama fjölda aukastafa. Vegna þessa myndast misræmi á milli útreikningskerfa kauphallaraðila sem veldur óþarfa viðskiptakostnaði. Kauphöllin hefur því ákveðið, að undangengnu umsagnarferli, að mælast til þess við markaðsaðila að útreikningur þeirra á dagvísitölu og afleiddu uppgjörsverði fylgi tilmælum þessum: 1. Notast skal við fimm aukastafi í dagvísitölu, og 2. sex aukastafi í afleiddu uppgjörsverði. Nánari útskýringar má sjá í viðhengi. Vinsamlegast hafið samband við Brynjar Örn Ólafsson (brynjar.olafsson@omxgroup.com, s. 525-2856) sé nánari upplýsinga óskað.
Tilmæli Kauphallarinnar:Fjöldi aukastafa í dagvísitölu og afleiddu uppgjörsverði
| Source: OMX Iceland