Stjórn Actavis hefur lagt formlegt mat á tilboð Novator, félags í eigu Björgólfs Thors Björgólfssonar, stjórnarformanns Actavis, sem birt var hluthöfum þann 1. júní síðastliðinn. Tilboðið var lagt fram í evrum og hljóðar upp á 0,98 evrur á hlut í reiðufé og boðið öllum hluthöfum í A flokki. Eftir að hafa lagt mat á tilboðið er það mat stjórnar félagsins að tilboðið endurspegli ekki raunverulegt virði félagsins og framtíðarmöguleika þess. Í samræmi við 41. grein yfirtökulaga frá árinu 2003 hefur jafnframt verið horft til fleiri þátta en þess verðs sem boðið hefur verið fyrir hluti í félaginu, s.s. fjármögnunar tilboðs, framtíðaráætlana og viðhorfs til stjórnenda, sem tilboðsgjafi gerir formlega grein fyrir í tilboði sínu. Þau atriði höfðu ekki áhrif á mat stjórnarinnar. Þeir stjórnarmenn sem lögðu mat á tilboðið og skiluðu sameiginlegu áliti eru Sindri Sindrason, Magnús Þorsteinsson og Baldur Guðnason. Stjórn félagins er opin fyrir viðræðum við Novator og ef nýtt tilboð verður birt hluthöfum mun stjórnin taka það til skoðunar og birta álit sitt á því. Frekari upplýsingar veita Halldor Kristmannsson Innri og ytri samskipti Actavis Sími: 550 3300 / 840 3425 hkristmannsson@actavis.com