Leiðrétting: Tillögur vantaði með fyrri frétt
AÐALFUNDUR LANDSBANKA ÍSLANDS HF. VERÐUR HALDINN Á
GRAND HÓTEL, SIGTÚNI 38, 105 REYKJAVÍK
MIÐVIKUDAGINN 23. APRÍL 2008 KL. 16.
Dagskrá:
1. Skýrsla bankaráðs um starfsemi bankans sl. starfsár
2. Ársreikningur fyrir liðið starfsár ásamt skýrslu endurskoðenda lagður fram
til staðfestingar
3. Ákvörðun um meðferð hagnaðar á síðastliðnu reikningsári
4. Ákvörðun um lækkun hlutafjár með niðurfellingu eigin bréfa
5. Ákvörðun um hækkun hlutafjár með útgáfu jöfnunarhlutabréfa
6. Kosning bankaráðs
7. Kosning endurskoðenda
8. Tillaga um að heimila bankanum að kaupa eða taka að veði allt að 10% af
eigin bréfum
9. Tillögur um breytingar á samþykktum
10.Tillaga um Starfskjarastefnu Landsbanka Íslands hf. lögð fram til
endurstaðfestingar
11.Tillaga bankaráðs um framlag í Menningarsjóð Landsbanka Íslands hf. fyrir
árið 2008 og um breytta skipulagsskrá Menningarsjóðs Landsbanka Íslands hf.
lögð fram til samþykktar
12. Ákvörðun um þóknun til bankaráðsmanna fyrir næsta kjörtímabil
13. Önnur mál, löglega fram borin
Tillögur frá hluthöfum, sem bera á fram á aðalfundi, skulu hafa borist í hendur
stjórnar með skriflegum hætti eigi síðar en sjö dögum fyrir aðalfund. Tilkynna
skal skriflega um framboð til bankaráðs eigi síðar föstudaginn 18. apríl kl.
16. Dagskrá, endanlegar tillögur, skýrsla bankaráðs, ársreikningur félagsins,
ásamt skýrslu endurskoðenda liggja frammi í Aðalbanka Landsbankans,
Austurstræti 11, Reykjavík, hluthöfum til sýnis viku fyrir aðalfund. Á sama
stað munu upplýsingar um framboð til bankaráðs liggja frammi tveimur dögum
fyrir aðalfund. Einnig er hægt að nálgast þessi gögn á www.landsbanki.is
Gerð er tillaga um að aðalfundur samþykki lækkun hlutafjár Landsbankans um kr.
300.000.000.- að nafnvirði með niðurfellingu á eigin hlutum Landsbankans.
Jafnframt er gerð tillaga um að aðalfundur samþykki hækkun hlutafjár með útgáfu
jöfnunarhluta um kr. 300.000.000.- að nafnvirði. Gerðar eru eftirfarandi
tillögur um breytingar á samþykktum félagsins; að aðalfundur samþykki heimild
til hækkunar hlutafjár Landsbankans um allt að kr. 1.200.000.000, með útgáfu
nýrra hluta. Hluthafar falla frá forgangsrétti sínum vegna nýju hlutanna, skv.
34. gr. laga nr. 2/1995 um hlutafélög. Gerð er tillaga um orðalagsbreytingu í
2. máls. 4. mgr. 7. gr. samþykktanna, að arður skuli greiddur þeim sem skráðir
verða í hlutaskrá eftir að uppgjör viðskipta við lok aðalfundardags hefur farið
fram. Þá er gerð tillaga um að aðalfundur samþykki heimild til útgáfu
breytanlegra skuldabréfa um allt að kr. 60.000.000.000.- og jafnframt hækkun
hlutafjár um allt að kr. 1.500.000.000.- að nafnverði í tengslum við slíka
útgáfu. Hluthafar falla frá forgangsrétti sínum til nýrra hluta vegna
breytanlegra skuldabréfa, skv. 34. gr. laga nr. 2/1995 um hlutafélög. Loks er
gerð tillaga um að ný málsgrein bætist við 11. gr. samþykktanna um heimild til
rafrænna samskipta við hluthafa.
Atkvæðaseðlar og önnur fundargögn verða afhent við inngang í upphafi fundar.
Hluthöfum er gefinn kostur á að greiða atkvæði um tillögur á dagskrá aðalfundar
með rafrænum hætti, sjá nánar á heimasíðu Landsbankans, www.landsbanki.is
/adalfundur2008.
Hluthöfum er bent á að kynna sér tillögurnar fyrir fundinn.
Nánari upplýsingar gefur Gunnar Viðar, forstöðumaður Lögfræðiráðgjafar í síma
410-7740
TILLÖGUR:
Í samræmi við lið 3 í dagskrá aðalfundar
Tillaga bankaráðs um meðferð hagnaðar fyrir reikningsárið 2007.
Ályktun aðalfundar Landsbanka Íslands hf. hinn 23. apríl 2008
Meðferð hagnaðar
Aðalfundur samþykkir að hagnaði ársins 2007 eftir skatta og hlutdeild
minnihluta, sem nam kr. 39.949 milljónum skuli ráðstafað til hækkunar á eigin
fé Landsbanka Íslands hf.
Greinargerð með tillögunni
Gerð er tillaga um að öllum hagnaði ársins 2007 verði ráðstafað til hækkunar á
eigin fé bankans. Ekki verður því um útgreiðslu arðs að ræða að þessu sinni.
Í samræmi við lið 4 í dagskrá aðalfundar
Tillaga bankaráðs um lækkun hlutafjár
Ályktun aðalfundar Landsbanka Íslands hf. hinn 23. apríl 2008
Lækkun hlutafjár
Aðalfundur Landsbanka Íslands hf. samþykkir lækkun á hlutafé bankans um kr.
300.000.000 að nafnverði þannig að eigin bréf Landsbanka Íslands hf. að sömu
fjárhæð verði felld niður. Hlutafé Landsbankans að lækkun lokinni verður kr.
10.892.754.087 að nafnvirði.
Greinargerð með tillögunni
Gerð er tillaga um að hluta af eigin bréfum Landsbankans verði ráðstafað til
lækkunar á hlutafé bankans. Lækkun þessi yrði ekki greidd út til hluthafa
heldur yrði hlutafé lækkað sem næmi nafnverði þessara eigin hluta. Tilgangur
hlutafjárlækkunarinnar er að minnka hlut Landsbankans í eigin bréfum. Um
lagaheimild fyrir hlutafjárlækkuninni er vísað til 4. ml. 1. mgr. 54. gr. laga
nr. 2/1995 um hlutafélög. Samkvæmt 2. mgr. 54. gr. sömu laga skal að lokinni
hlutafjárlækkun vera fyrir hendi fjármagn er svari a.m.k. til hlutafjárins og
þess fjár er lagt hefur verið í lögmælta varasjóði. Ekki skapast skylda til
innköllunar enda er verið að ógilda hluti sem eru að fullu greiddir, sbr. 3.
mgr. 54. gr. sömu laga.
Með þessari framkvæmd yrði einungis um tilfærslur innan höfuðstóls að ræða og
eignarhlutur einstakra hluthafa myndi í engu breytast. Lækkun hlutafjár ef
þessum toga telst ekki úthlutun á skattskyldum arði í skilningi l. nr. 90/2003
um tekjuskatt og því ekki forsendur til að halda eftir staðgreiðslu skatts á
fjármagnstekjur í samræmi við l. nr. 94/1996 um staðgreiðslu skatts á
fjármagnstekjur.
Í samræmi við lið 5 í dagskrá aðalfundar
Tillaga bankaráðs um hækkun hlutafjár með útgáfu jöfnunarhluta
Ályktun aðalfundar Landsbanka Íslands hf. hinn 23. apríl 2008
Hækkun hlutafjár með útgáfu jöfnunarhluta
Aðalfundur Landsbanka Íslands hf. samþykkir útgáfu jöfnunarhlutabréfa í
bankanum að nafnvirði kr. 300.000.000 í samræmi við 43. gr. l. nr. 2/1995 um
hlutafélög. Eftir útgáfu jöfnunarbréfa mun heildarhlutafé nema kr.
11.192.754.087 að nafnverði. Jöfnunarhlutir verða gefnir út til þeirra sem
skráðir verða í hlutaskrá eftir að uppgjör viðskipta sem eiga sér stað fyrir
lok aðalfundardags hefur farið fram.
Greinargerð með tillögunni
Þar sem ætlunin er að ráðstafa eigin bréfum bankans til lækkunar á hlutafé
bankans telja stjórnendur bankans nauðsynlegt á sama tíma að nafnverð hlutafjár
sé óbreytt. Útgáfa jöfnunarhlutabréfanna myndi ekki hafa í för með sér breytta
eignarhlutdeild einstakra hluthafa þar sem eingöngu verði um tilfærslur á
höfuðstól að ræða. Ekki yrði um skattskyldan arð að ræða þar sem útgáfan yrði í
samræmi við 2. málslið 1. mgr. 11. gr. l. nr. 90/2003 um tekjuskatt og ber
Landsbanka Íslands hf. engin skylda til að halda eftir staðgreiðslu skatts á
fjármagnstekjur í samræmi við l. nr. 94/1996 um staðgreiðslu skatts á
fjármagnstekjur. Athygli hluthafa er vakin á því að upphafsvirði þeirra hluta
sem hluthafar fá við útgáfu jöfnunarhlutanna verður núll og því ber að greiða
fjármagnstekjuskatt af öllu söluverði hlutanna ef og þegar til þess kemur að
þeir verða seldir.
Landsbanki Íslands hf hefur fengið í hendur bindandi álit frá Ríkisskattstjóra
þar sem sú niðurstaða kemur fram að lækkun hlutafjár sem framkvæmd er í því
skyni að eyða út eigin bréfum Landsbankans og hækkun hlutafjár í kjölfarið með
útgáfu jöfnunarhluta leiði ekki til skattskyldu fyrir hluthafa. Ljóst er að
niðurstaðan af þessum tveimur aðgerðum fyrir hluthafa er sú að þeir munu eiga
meira nafnverð hlutafjár en fyrir. Eignarhluti þeirra af útistandandi hlutafé
verður óbreyttur en eignarhlutur þeirra ef litið er til skráðs hlutafjár hefur
hins vegar breyst.
Í samræmi við lið 7 í dagskrá aðalfundar
Tillaga um kosningu endurskoðenda.
Ályktun aðalfundar Landsbanka Íslands hf. hinn 23. apríl 2008.
Kosning endurskoðenda
Aðalfundur Landsbanka Íslands hf. kýs PricewaterhouseCoopers hf. sem
endurskoðendur félagsins fyrir fjárhagsárið 2008.
Í samræmi við lið 8 í dagskrá aðalfundar
Tillaga um endurnýjun heimildar stjórnar til kaupa á eigin bréfum.
Ályktun aðalfundar Landsbanka Íslands hf. hinn 23. apríl 2008
Heimild til kaupa á eigin hlutum
Aðalfundur Landsbanka Íslands hf. veitir bankaráði heimild til að ákveða kaup á
hlutum í félaginu eða taka slíka hluti að veði, sem nemi allt að 10% hlutafjár.
Heimild þessi verði nýtt innan 18 mánaða frá samþykkt aðalfundar. Nafnverð
hluta sem félagið kann að eignast samkvæmt heimild þessari má vera allt að kr.
1.119 milljónir en nýti bankaráð heimild til hækkunar hlutafjár hækkar
nafnvirði samkvæmt þessari heimild um samsvarandi hlutfall. Kaupverðið skal
vera á gengi sem sé ekki meira en 10% hærra og ekki meira en 10% lægra en skráð
gengi í kauphöll OMX Nordic Exchange á Íslandi hverju sinni. Heimild þessi
kemur í stað heimildar til kaupa á allt að 10% hlutafjár félagsins, sem
samþykkt var á aðalfundi félagsins 9. febrúar 2007.
Bankastjórn er jafnframt veitt umboð til að taka allar nánari ákvarðanir um
framkvæmd slíkra viðskipta.
Í samræmi við lið 9 í dagskrá aðalfundar
Tillögur um breytingar á samþykktum.
Ályktun aðalfundar Landsbanka Íslands hf. hinn 23. apríl 2008
1. Orðalagsbreyting varðandi greiðslu arðs.
Aðalfundur Landsbanka Íslands hf. samþykkir orðalagsbreytingu í 2. málsl. 4.
mgr. 7. gr. samþykktanna um að arður verði greiddur þeim sem skráðir verða í
hlutaskrá eftir að uppgjör viðskipta við lok aðalfundardags hefur farið fram.
Eftir breytingu þessa mun 2. máls. 4. mgr. 7. gr. verða svohljóðandi:
”Arður skal greiddur þeim sem skráðir verða í hlutaskrá eftir að uppgjör
viðskipta sem eiga sér stað fyrir lok aðalfundardags hefur farið fram.”
Greinargerð með tillögunni:
Ekki eru um efnislega breytingu á ákvæðinu að ræða heldur er verið gera skýrara
orðalag ákvæðisins um að arður verði greiddur út til þeirra hluthafa sem
skráðir verða í hlutaskrá aðalfundar eftir að uppgjör vegna viðskipta sem áttu
sér stað fyrir lok aðalfundardags hefur framið fram hjá kauphöll. Í reglum
fyrir útgefendur fjármálagerninga í kauphöll OMX Nordic Exchange á Íslandi er
til þess mælst að aðilar tilgreindir í hlutaskrá félags í lok arðsréttindadags,
sem er þriðji viðskiptadagur eftir aðalfundardag, eigi tilkall til arðs þar sem
uppgjör vegna þeirra viðskipta á aðalfundardag fer fram þann dag.
2. Heimild til aukningar hlutafjár
Aðalfundur Landsbanka Íslands hf. samþykkir að breyta 2. mgr. 4. gr. samþykkta
félagsins með þeim hætti sem hér greinir:
”Bankaráði er heimilt að auka hlutafé félagsins í áföngum, um allt að kr.
1.200.000.000 að nafnverði, með áskrift nýrra hluta. Hluthafar falla frá
forgangsrétti sínum skv. 34. gr. laga nr. 2/1995 um hlutafélög til hækkunar
hlutafjár skv. þessari málsgrein. Bankaráði er falið að ákveða nánari útfærslu
á hækkun þessari m.t.t. verðs og greiðsluskilmála. Heimild þessi gildir til 23.
apríl 2013. Bankaráði er heimilt að ákveða að áskrifendur greiði fyrir hina
nýju hluti að hluta eða öllu leyti í öðru en reiðufé.”
Greinargerð með tillögunni:
Á aðalfundi Landsbankans þann 9. febrúar 2007 var samþykkt tillaga bankaráðs um
heimild til hækkunar hlutafjár um allt að kr. 1.200.000.000 að nafnvirði með
áskrift nýrra hluta. Hluti þessarar heimildar var nýttur við kaup Landsbankans
á breska fyrirtækinu Bridgewell (nú Landsbanki Securites (UK)) sem gekk í gegn
síðastliðið sumar. Verði fyrirliggjandi tillaga samþykkt kemur hún í staðinn
fyrir og fellir úr gildi núgildandi heimild í samþykktum fyrir Landsbankann um
hækkun hlutafjár um allt að kr. 1.027.923.716 að nafnvirði. Rétt þykir að
bankaráð hafi sama sveigjanleika og ákveðinn var á síðasta fundi til að ákveða
hækkun hlutafjár.
3. Heimild til útgáfu breytanlegra skuldabréfa
Aðalfundur Landsbanka Íslands hf. samþykkir að bæta nýrri málsgrein við 4. gr.
samþykktanna sem verður 6.mgr. 4. gr. og hljóðar svo:
“Bankaráði er heimilt að gefa út breytanleg skuldabréf að hámarki að fjárhæð
kr. 60.000.000.000 - sextíu milljarðar króna- sem hafa að geyma skilmála um að
heimilt eða skylt sé að breyta slíkum skuldabréfum í hlutabréf í Landsbanka
Íslands hf. Bankaráði er jafnframt heimilt að auka hlutafé félagsins um allt að
kr. 1.500.000.000 - einn milljarð og fimmhundruð milljónir - að nafnvirði til
að mæta skuldbindingum félagsins samkvæmt hinum breytanlegu skuldabréfum.
Hluthafar falla frá forgangsrétti sínum til hinna nýju hluta skv. 34. gr. laga
nr. 2/1995 um hlutafélög. Hinir nýju hlutir skulu vera í sama flokki og með
sömu réttindi og aðrir hlutir í félaginu. Hinir nýju hlutir veita réttindi í
félaginu frá skrásetningardegi hlutafjárhækkunarinnar og engar hömlur skulu
vera á viðskiptum með þá. Bankaráð skal að öðru leyti taka ákvörðun um skilmála
útgáfu hinna breytanlegu skuldabréfa og um hækkun hlutafjárins og ennfremur í
hvaða áföngum heimild þessi verður nýtt. Bankaráði er jafnframt heimilt að gera
þær breytingar á samþykktum félagsins sem nauðsynlegar kunna að vera vegna
nýtingar á breytirétti skuldabréfanna. Heimild þessi gildir til 23. apríl
2013. “
Greinargerð með tillögunni:
Lántaka með breytirétti felur í sér að lánveitendur eiga rétt til að breyta
skuldum í hlutabréf í Landsbankanum við ákveðnar kringumstæður og í öðrum
tilfellum kann það að vera skylt eftir efni samningsins. Ljóst er því að
fjármögnun með þessum hætti getur leitt til hlutafjárhækkunar síðar. Engar
viðræður hafa átt sér stað við lánveitendur um lántöku af þessu tagi heldur er
talið rétt að auka sveigjanleika Landsbankans til að afla sér lánsfjár síðar á
innlendum sem erlendum mörkuðum.
4. Rafræn skjalasamskipti og rafpóstur
Aðalfundur Landsbanka Íslands hf. samþykkir að taka upp nýja málsgrein í 11.
grein samþykktanna sem verður 4. mgr. 11. gr. Hin nýja málsgrein verður
svohljóðandi:
”Í samskiptum Landsbankans við hluthafa skal heimilt að nota rafræn
skjalasamskipti og rafpóst við sendingar hvers kyns tilkynninga til hluthafa í
stað tilkynninga á rituðum pappír. Með tilkynningum til hluthafa er meðal
annars átt við tilkynningar um hlutafjáreign (hlutafjármiða), arð og hverjar
aðrar tilkynningar sem bankaráð ákveður að senda til hluthafa. Ákvæði þetta
skal jafnframt ná til og eru jafngild þeim ákvæðum sem kveða á um að
tilkynningar til hluthafa séu lagðar fram á rituðum pappír. Upplýsingar um
hvaða tilkynningar til hluthafa eru á rafrænu formi, hvar hægt er að nálgast
leiðbeiningar um framkvæmd rafrænna samskipta og þann hugbúnað sem þarf að nota
við rafræn samskipti skulu hluthöfum aðgengileg á heimasíðu Landsbankans og
skrifstofu bankastjórnar. Bankaráði er falin nánari útfærsla á rafrænum
samskiptum og rafpóstsendingum, þeim kröfum sem gerðar eru til tæknibúnaðar og
á hvaða hátt hluthöfum er tilkynnt um hvaða samskipti skulu vera með rafrænum
hætti.”
Greinargerð með tillögunni:
Í nýrri grein 80. b. í lögum nr. 2/1995 um hlutafélög, sem tók gildi 1. október
2006, er kveðið á um að hlutahafafundur geti tekið ákvörðun um noktun rafrænna
skjalasamskipta og rafpósts í samskiptum milli félags og hluthafa þess í stað
þess að senda eða leggja fram skjöl rituð á pappír. Gerð er tillaga um að
hluthafafundur samþykki að taka ofangreinda tillögu upp í samþykktir félagsins
og veita þar með heimild til rafrænna samskipta og rafpóstsendina í samskiptum
við hluthafa enda ætti slíkt að vera til þess fallið að auðvelda samskipti við
hluthafa.
Í samræmi við lið 10 í dagskrá aðalfundar
Tillaga bankaráðs um Starfskjarastefnu Landsbanka Íslands hf. lögð fram til
endurstaðfestingar.
Eftirfarandi starfskjarastefna sem samþykkt var á aðalfundi 2007 er hér með
lögð fram til endurstaðfestingar:
“Starfskjarastefna Landsbankans hér að neðan byggir á meginreglum sem gilda um
góða stjórnarhætti fyrirtækja og langtímasjónarmiðum um vöxt og hámörkun
arðsemi fyrir hluthafa bankans.
Bankaráðsmenn fá greidda fasta þóknun fyrir störf sín. Þóknun hvers
bankaráðsmanns og varamanna skal ákveðin á aðalfundi bankans og greiðast í
samræmi við launagreiðslur til almennra bankastarfsmanna.
Starfskjör bankaráðsmanna skulu taka mið af þeirri ábyrgð sem starfinu fylgir,
því flókna umhverfi sem Landsbankinn starfar nú í, þeim kjörum sem almennt
gerast um slík störf á fjármálamarkaði í þeim löndum sem bankinn hefur
starfsemi í og því vinnuframlagi sem þörf er á starfsins vegna.
Bankaráðsmenn sem sitja í Endurskoðunarnefnd og Kjaranefnd skulu fá greidda
fasta þóknun fyrir störf sín.
Á aðalfundi skulu bornar upp til samþykkis tillögur um launakjör bankaráðs og
nefnda þess fyrir komandi rekstrarár.
Starfskjör bankastjóra Landsbankans byggjast á ráðningarsamningum. Taka
starfskjörin m.a. mið af ábyrgð og eðli starfans í ljósi stærðar og umsvifa
bankans, þeim starfskjörum sem almennt gerast á fjármálamörkuðum í þeim löndum
sem bankinn hefur starfsemi í og þeim rekstrarárangri sem bankinn nær.
Starfskjör bankastjóra geta verði samansett af föstum launum, árangurstengdum
greiðslum í reiðufé og hlutabréfum, valréttum, skuldabréfum með breytirétti,
lífeyrisréttindum og eftirlaunaréttindum.
Á aðalfundi bankans skulu hluthafar upplýstir um heildarfjárhæð greiddra launa
til bankaráðsmanna og bankastjóra á liðnu starfsári; föst laun, fjárhæð
árangurstengdra launa, greiðslur í formi hlutabréfa, valrétta, forkaupsréttar,
greiðslur frá öðrum félögum í samstæðu bankans og starfslokagreiðslur til
þeirra sem látið hafa af störfum á starfsárinu.”
Í skýringum nr. 35 og 36 í ársreiknigi er gerð ítarleg grein fyrir framkvæmd
starfskjarastefnunnar og er hluthöfum bent á að kynna sér þessar skýringar.
Greinargerð með tillögunni:
Starfskjarastefna Landsbankans sem samþykkt var á aðalfundi Landsbankans þann
9. febrúar 2007 í samræmi við 79.gr.a í lögum nr. 2/1995 um hlutafélög, þykir
hafa gefið góða raun og er nú lögð fram til endurstaðfestingar á aðalfundi
Landsbankans 2008. Starfskjarastefnan er leiðbeinandi fyrir bankaráð um efni
hennar nema þar sem lög mæla fyrir á annan veg.
Í samræmi við lið 11 í dagskrá aðalfundar
Tillaga um framlag í sjóðinn fyrir árið 2008 og breytta skipulagsskrá
Menningarsjóðs Landsbanka Íslands hf.
Ályktun aðalfundar Landsbanka Íslands hf. hinn 23. apríl 2008
Aðalfundur Landsbanka Íslands hf. samþykkir að framlag í Menningarsjóð
Landsbankans verði kr. 100.000.000.- á árinu 2008.
Aðalfundur Landsbanka Íslands hf. samþykkir tillögur bankaráðs um breytta
skipulagsskrá fyrir Menningarsjóð Landsbankans, sbr. 8. grein núverandi
skipulagsskrár. Tillögur bankaráðs koma fram í fylgiskjali þar sem færðar hafa
verið inn breytingar sem lagt er til að nái fram að ganga, sbr. einnig lýsingu
í greinargerð hér að neðan.
Greinargerð með tillögunni
Landsbankinn hefur um árabil verið dyggur styrktaraðili mannúðar-, mennta-,
menninga- og íþrótta- og æskulýðsmála. Tillaga að breyttri skipulagsskrá
Menningarsjóðs felur í sér að starfsemi sjóðsins er efld enn frekar frá því sem
nú. Auk eflingar Menningarsjóðs er áfram gert ráð fyrir að bankastjórn geti
veitt fjárframlögum til verðugra málefna eða tiltekinna samvinnu- og
stuðningsverkefna til viðbótar við úthlutanir Menningarsjóðs.
Eftirfarandi eru helstu tillögur til breytingar á skipulagsskrá Menningarsjóðs:
• Aðalfundur Landsbankans ákveði framlög í Menningarsjóð (2. grein)
o Tillaga er gerð um að aðalfundur Landsbankans samþykki árlega, að tillögu
bankaráðs, fjárframlag í sjóðinn. Meginbreytingin verður sú að í stað
þess að bankaráð ákveði framlög Landsbankans í sjóðinn tekur aðalfundur þá
ákvörðun þar sem slíkt verður að teljast í betra samræmi við það að
hluthafar sem fara með æðsta vald í málefnum félagsins taki ákvörðun um
að slík framlög.
• Styrkir til íþrótta- og æskulýðsmála (3. grein)
o Tillaga er gerð um að markmið sjóðsins verði auk stuðnings og styrkja til
mannúðar-, mennta- og menningarmála styrkir til íþrótta- og æskulýðsmála.
• Stjórnarmenn í stjórn Menningarsjóðs verði fimm í stað fjögurra (4. grein)
o Gerð er tillaga um að stjórn sjóðsins verði skipuð þremur bankaráðsmönnum
í stað tveggja auk annars bankastjóra og formanni Félags starfsmanna
Landsbankans.
• Stjórn sé heimilt að tilnefna ritara Menningarsjóðs (4. grein)
o Tillaga er gerð um að stjórn sé heimilt að tilnefna ritara Menningarsjóðs
til þess að annast undirbúning funda, úrvinnslu styrkumsókna og annað sem
snýr að styrkveitingum. Gert er ráð fyrir að ritari Menningarsjóðs sé
starfsmaður þeirrar deildar innan Landsbankans sem hefur umsjón með
styrkveitingum.
• Sérstakar undirnefndir stjórnar - heimild til tilnefningar fagaðila utan
Landsbankans til setu í slíkum undirnefndum (5. grein). Núgildandi 5. gr.
sett í 7.gr.
o Gerð er tillaga um nýja grein 5 í skipulagsskránni um að stjórn
Menningarsjóðs verði heimilt að tilnefna sérstakar undirnefndir stjórnar
sem falið yrði að fjalla um ákveðna flokka styrkveitinga.
o Gert er ráð fyrir að í starfsreglum sem stjórn Menningarsjóðs setur sér
yrðu settar nánari reglur um hvaða undirnefndir þetta séu og fyrirkomulag
þeirra.
o Heimilt verði að tilnefna fagaðila utan Landsbankans til setu í slíkum
undirnefndum.
o Undirnefndum skuli heimilt að afgreiða styrki úr Menningarsjóði utan
hefðbundinna úthlutana Menningarsjóðs.
• Núgildandi 6. gr. sett undir 2. gr. þar sem fjallað er um framlag í sjóðinn
og tekjur hans.
• Núverandi 7. grein verður 6. grein. - Úthlutanir úr Menningarsjóði -
Starfsreglur
o Gerð er tillaga um að úthlutað sé úr Menningarsjóði að jafnaði einu sinni
á ári.
o Stjórn Menningarsjóðs skuli setja sér starfsreglur sem stuðst skal við
þegar ákvarðanir um úthlutanir úr sjóðnum eru teknar og um annað sem snýr
að starfsemi sjóðsins.
Í samræmi við lið 12 í dagskrá aðalfundar
Tillaga um þóknun bankaráðsmanna:
Ályktun aðalfundar Landsbanka Íslands hf. hinn 23. apríl 2008.
Þóknun bankaráðsmanna
Þóknun hvers bankaráðsmanns fyrir tímabilið frá aðalfundi 2008 til aðalfundar
2009 skal vera kr. 350.000,- á mánuði, greitt í samræmi við launagreiðslur til
bankamanna. Þóknun bankaráðsformanns skal vera þreföld hærri en þóknun
bankaráðsmanns og þóknun varaformanns skal vera tvöfallt hærri en þóknun
bankaráðsmanns. Þóknun til varamanna skal vera kr 100.000,- fyrir hvern setinn
fund. Þar að auki verði þeim bankaráðsmönnum sem sitja í endurskoðunarnefnd og
kjaranefnd bankaráðs greiddar kr. 150.000,- á mánuði fyrir setu í hverri nefnd
en þóknun formanns hverrar nefndar verði þreföld sú fjárhæð.
Greinargerð með tillögunni:
Gerð er tillaga um óbreytta tilhögun á greiðslu þóknunar til bankaráðsmanna.
Í samræmi við lið 11 í dagskrá aðalfundar
FYLGISKJAL
TILLAGA BANKARÁÐS UM BREYTTA SKIPULAGSSKRÁ
FYRIR MENNINGARSJÓÐ LANDSBANKA ÍSLAND HF.
1. grein
Sjóðurinn heitir Menningarsjóður Landsbanka Íslands hf. Heimili og varnarþing
sjóðsins er í Reykjavík. Sjóðurinn er stofnaður á fundi bankaráðs Landsbanka
Íslands hf. þann 6. mars 1998.
2. grein
Stofnfé sjóðsins er ákveðið af bankaráði kr. 5.000.000.- fimm milljónir króna -
Stofnfé er lagt fram af Landsbanka Íslands hf.
[Aðalfundur Landsbankans skal árlega, að tillögu bankaráðs, samþykkja
fjárframlag sem veitt skal í sjóðinn og sjóðurinn skal hafa til ráðstöfunar á
komandi starfsári. Tekjur sjóðsins skulu auk þess vera vaxtatekjur og framlög
frá dótturfélögum Landsbankans.] Þá er sjóðnum heimilt að taka við framlögum
frá öðrum.
3. grein
Markmið sjóðsins er að veita stuðning og styrkja með fjárframlögum verðug
mannúðar-, mennta-, menningar- [og íþrótta- og æskulýðsmál.]
Stefnt skal að því að hafa styrkveitingar sem fjölbreyttastar og tryggja
dreifingu þeirra til sem flestra menningargreina.
4. grein
Í stjórn sjóðsins skulu árlega valdir [fimm fulltrúar] af bankaráði
Landsbankans. Stjórnin skal skipuð þremur bankaráðsmönnum, einum bankastjóra og
formanni Félags starfsmanna Landsbankans.
[Stjórn sjóðsins er heimilt að tilnefna ritara Menningarsjóðs sem annast m.a.
undirbúning funda sjóðsins.]
5. grein [Núgildandi 5.gr. sett í 7.gr.]
[Stjórn sjóðsins skal heimilt að tilnefna sérstakar undirnefndir stjórnar til
þess að fjalla um ákveðna flokka styrkveitinga. Í starfsreglum sem stjórn
Menningarsjóðs setur sér skal nánar tilgreint hverjar þessar undirnefndir eru
og hvaða styrkveitingar falli þar undir.
Sæti í undirnefndum skulu eiga fulltrúar úr stjórn Menningarsjóðs auk þess sem
heimilt er að tilnefna fagaðila utan Landsbankans til setu í undirnefndum.
Undirnefndum skal heimilt að afgreiða styrki úr Menningarsjóði utan reglulegra
úthlutana úr Menningarsjóði, sbr. 1. mgr. 6. gr.]
6. grein [Var áður 7. gr., núgildandi 6. gr. sett í 2. gr.]
Stjórnin ráðstafar (úthlutar) fé sjóðsins og ákveður að eigin frumkvæði eða
samkvæmt umsóknum að jafnaði [einu sinni á ári.]
[Stjórn Menningarsjóðs skal setja sér starfsreglur sem styðjast skal við þegar
ákvarðanir um úthlutanir úr sjóðnum eru teknar.]
7. grein [var 5.gr.]
Reikningsár sjóðsins er almanaksárið. Ársreikningur sjóðsins skal endurskoðaður
af löggiltum endurskoðendum Landsbanka Íslands hf. og birtur með ársreikningi
bankans.
8. grein
Skipulagsskrá þessi var lögð fyrir aðalfund Landsbanka Íslands hf. þann 6. mars
1998 og samþykkti aðalfundur hana fyrir sitt leyti. Aðeins aðalfundur
Landsbanka Íslands hf. getur tekið ákvörðun um breytingar á skipulagsskrá
þessari eða lagt sjóðinn niður. Verði sjóðurinn lagður niður ráðstafar
aðalfundur eignum hans til þeirra verkefna sem sjóðnum er ætlað að styrkja.
[Breytingar samþykktar á aðalfundi Landsbanka Íslands hf. þann 23. apríl 2008.]
9. grein
Leita skal staðfestingar dómsmálaráðherra á skipulagsskrá þessari.
Reykjavík, 23. apríl 2008
Leiðréttin: - Dagskrá og tillögur aðalfundar 23. apríl 2008 - Frétt birt 2008-04-11 19:27:19 CEST
| Source: Landsbanki Íslands hf.