Fréttatilkynning
HS Orka hefur fengið niðurstöðu gerðardóms
Reykjanesbæ, 19. desember 2011
HS Orka hefur nú fengið í hendur niðurstöðu úr gerðardómsmáli varðandi gildi orkusölusamnings milli HS Orku og Norðuráls Helguvík en samkvæmt samningnum myndi HS Orka afhenda orku til nýrrar álverksmiðju sem Norðurál er að reisa í Helguvík.
Niðurstöður gerðardómsins voru ekki einhliða þar sem báðir aðilar fengu jákvæða niðurstöðu í ákveðnum atriðum kröfugerðar sinnar. Þó úrskurðurinn kveði á um ákveðna afhendingarskyldu HS Orku til hins nýja álvers er sú afhendingarskylda háð því að uppfyllt verði nokkur skilyrði sem gerðardómurinn úrskurðaði að ekki hefðu verið uppfyllt. Gerðardómurinn hafnaði kröfu Norðuráls um skaðabætur.
HS Orka mun vinna með Norðuráli að því að ná ásættanlegri niðurstöðu varðandi þau atriði sem upp hafa komið með þessum úrskurði.