Eyrir Invest gerir tilboð í skuldabréfaflokkinn EYRI 11 1 samkvæmt skilmálum skuldabréfanna og er stefnt að afskráningu flokksins í framhaldi af uppkaupum. Uppkaup fara fram á pari.
Rekstur Eyris Invest fer vel af stað á árinu 2013. Samkvæmt óendurskoðuðu uppgjöri félagsins fyrir fyrsta ársfjórðung 2013 er hagnaður af starfssemi félagsins 21 milljón evra eftir skatta.
Stjórn Eyris Invest hefur ákveðið að styrkja enn frekar fjárhagsstöðu félagsins og auka sveigjanleika í rekstri. Eyrir Invest seldi í dag 3,8% eignarhlut í Marel og verður söluandvirðið notað til að greiða allar skuldbindingar sem eru á gjalddaga á næstu tveimur árum. Eftir þessa aðgerð er félagið með sterkt eiginfjárhlutfall og allar skuldbindingar fjármagnaðar til lengri tíma.
Eyrir Invest er áfram afgerandi kjölfestufjárfestir í Marel með 29,3% eignarhlut, rétt undir viðmiðunarmörkum varðandi yfirtökuskyldu á skráðum hlutabréfum á Nasdaq OMX Iceland.
Frekari upplýsingar;
Árni Oddur Þórðarson, forstjóri Eyris Invest.
Sími: 525-0200
Um Eyrir Invest
Eyrir er alþjóðlegt fjárfestingarfélag sem leggur ríka áherslu á virka þátttöku í rekstri og stefnumörkun lykileigna sinna. Kjölfestueignir Eyris eru 29% hlutur í Marel og 17% hlutur í iðnfyrirtækjunum Fokker Technologies og Stork Technical Services. Að auki fjárfestir Eyrir í spennandi sprotum og styður þá til vaxtar í gegnum fjárfestingarfélagið Eyrir sprotar. „Kaupa og styðja til vaxtar“ stefna Eyris hefur skilað góðri ávöxtun frá stofnun félagsins um mitt ár 2000.
Athygli fjárfesta er vakin á eftirfarandi
Sumar staðhæfingar í þessari fréttatilkynningu kunna að vera byggðar á mati og áætlunum stjórnenda félagsins en ekki á staðreyndum sem hægt er að sannreyna við birtingu hennar. Í eðli sínu fela slíkar staðhæfingar því í sér óvissu. Við vekjum þess vegna athygli fjárfesta á því að margir þættir geta haft þau áhrif að rekstrarumhverfi og afkoma verði með öðrum hætti en forsendur gera ráð fyrir í þessari tilkynningu. Tilkynningin verður ekki endurskoðuð eftir birtingu hvað þetta varðar.