Betri staða en áætlað var
Ársreikningar Akureyrarbæjar fyrir árið 2019 voru lagðir fram í bæjarráði í dag. Rekstur samstæðunnar gekk betur en áætlun hafði gert ráð fyrir. Akureyrarbær var rekinn með 463 millj. kr. afgangi en áætlun hafði gert ráð fyrir 86 millj. kr. halla. Sjóðstreymi ársins var líka betra en áætlað hafði verið.
Rekstur samstæðu Akureyrarbæjar var viðunandi og rekstrarniðurstaða ársins nokkru betri en fjárhagsáætlun gerði ráð fyrir. Rekstrarniðurstaða samstæðunnar fyrir fjármagnsliði og tekjuskatt var jákvæð um 1.619 millj. kr. en áætlun hafði gert ráð fyrir 1.603 millj. kr. rekstrarafgangi. Heildarniðurstaðan var þó ívið betri en áætlað hafði verið eða 463 millj. kr. afgangur en áætlun gerði ráð fyrir 86 millj. kr. neikvæðri niðurstöðu.
Samkvæmt yfirliti um sjóðstreymi nam veltufé frá rekstri 2.974 millj. kr. sem var ríflega 388 millj. kr. hærra en áætlað var. Sambærileg fjárhæð árið áður var 3.219 millj. kr. Handbært fé frá rekstri nam 2.479 millj. kr. Fjárfestingahreyfingar námu samtals nettó 3.814 millj. kr. en fjármögnunarhreyfingar námu samtals nettó 197 millj. kr. Afborgun langtímalána nam 643 millj. kr. en ný langtímalán voru 786 millj. kr. Lækkun á handbæru fé á árinu nam 1.138 millj. kr. og var handbært fé samstæðunnar í árslok 1.681 millj. kr. Veltufé frá rekstri árið 2019 í hlutfalli við tekjur nam 10,9% í samstæðunni og 7,0% í A-hluta. Árið áður voru hlutföllin 12,6% í samstæðunni og 8,5% í A-hluta.
Heildarlaunagreiðslur án launatengdra gjalda og hækkunar lífeyrisskuldbindinga hjá samstæðunni voru 12.175. millj. kr. Fjöldi stöðugilda var að meðaltali 1.599 sem er fjölgun um 36 stöðugildi frá árinu áður. Laun og launatengd gjöld samstæðunnar í hlutfalli við rekstrartekjur þess voru 56,9%. Annar rekstrarkostnaður var 30,4% af rekstrartekjum. Skatttekjur og jöfnunarsjóður sveitarfélagsins voru 839 þús. kr. á hvern íbúa en tekjur samtals 1.428 þús. kr. á hvern íbúa. Árið 2018 voru skatttekjurnar 791 þús. kr. á hvern íbúa og heildartekjurnar 1.353 þús. kr. á hvern íbúa.
Niðurstaða rekstrar A-hluta var jákvæð um 57 millj. kr. en fjárhagsáætlun gerði ráð fyrir neikvæðri niðurstöðu um 629 millj. kr.
Samkvæmt efnahagsreikningi voru eignir sveitarfélagsins í árslok 2019 bókfærðar á 56.439 millj. kr. en þar af voru veltufjármunir 4.859 millj. kr. Skuldir sveitarfélagsins með lífeyrisskuldbindingum námu samkvæmt efnahagsreikningi 30.005 millj. kr. en þar af voru skammtímaskuldir 4.219 millj. kr.
Fjárhagur Akureyrarbæjar er traustur og nam skuldaviðmið samstæðunnar í árslok 73% samkvæmt reglum Eftirlitsnefndar með fjármálum sveitarfélaga en það var 75% árið áður. Skuldaviðmið í A-hluta var 55% í árslok en var 59% árið áður.
Veltufjárhlutfallið var 1,15 í árslok 2019 en var 1,38 árið áður. Bókfært eigið fé nam 26.434 millj. kr. í árslok en var 24.796 millj. kr. í árslok árið áður. Eiginfjárhlutfall var 47% af heildarfjármagni en var 46% árið áður.
Mjög óvenjulegar aðstæður hafa skapast vegna Covid-19 faraldursins. Veruleg óvissa ríkir um það hverjar afleiðingarnar verða og hversu lengi þeirra mun gæta. Viðbúið er að áhrif á rekstur sveitarfélagsins verði umtalsverð m.a. vegna lægri tekna og aukinna útgjalda. Fjárhagur Akureyrarbæjar er hins vegar traustur og skuldastaða tiltölulega lág. Bærinn er því fremur vel í stakk búinn til að takast á við efnahagslegar afleiðingar faraldursins þó einsýnt sé að niðursveiflan muni hafa veruleg áhrif á afkomuna árið 2020.
.
Samkvæmt sveitarstjórnarlögum skal fjalla um ársreikninginn á tveimur fundum í sveitarstjórn og verður hann til umfjöllunar í bæjarstjórn Akureyrar 21. apríl og 5. maí nk.
Ársreikningurinn er settur fram samkvæmt lögum um reikningsskil sveitarfélaga. Starfseminni er skipt upp í tvo hluta, A-hluta annars vegar og B-hluta hins vegar. Til A-hluta telst starfsemi sem að hluta eða öllu leyti er fjármögnuð með skatttekjum. Til B–hluta teljast fjárhagslega sjálfstæð fyrirtæki sem að hálfu eða að meirihluta eru í eigu sveitarfélagsins en rekstur þeirra er að stofni til fjármagnaður með þjónustutekjum.
Akureyri, 16. apríl 2020
Nánari upplýsingar veitir Dan Brynjarsson, sviðsstjóri fjársýslusviðs, í síma 460 1000.
Viðhengi
