Afkoma HB Granda hf. árið 2008
• Rekstrartekjur ársins voru 124 m€, en voru 141 m€ árið áður
• EBITDA var 30 m€ (24 %) en var 31 m€ (22 %) árið 2007
• Hagnaður ársins var 16 m€, en var 20 m€ árið áður
Uppgjör í evrum
HB Grandi birtir nú uppgjör sitt í fyrsta sinn í evrum. Slíkt uppgjör gefur
betri mynd af afkomu og stöðu félagsins en uppgjör í íslenskum krónum, þar sem
stærstur hluti tekna er í evrum, sem og stór hluti gjalda. Þá hefur evran mest
vægi í samsetningu eigna og skulda og þar með eigin fé. Til samanburðar hefur
ársreikningur ársins 2007 verið umreiknaður í evrur miðað við lokagengi þess
árs.
Rekstur ársins 2008
Rekstrartekjur HB Granda hf. árið 2008 námu 124 m€, samanborið við 141 m€ árið
áður. Rekstrarhagnaður fyrir afskriftir (EBITDA) var 30 m€ eða 24% af
rekstrartekjum, en var 31 m€ eða 22% árið áður. Áhrif fjáreignatekna og
fjármagnsgjalda voru neikvæð um 14 m€, en voru jákvæð um 6 m€ árið áður. Inni
í þessum lið fyrir árið 2008 telst gengismunur lána, sem er nú mun minni stærð
en áður, þar sem hann ræðst eingöngu af innbyrðis breytingum á gengi erlendra
gjaldmiðla, en ekki af flökti á gengi íslensku krónunnar. Fyrir árið 2007 er
hins vegar færður allur gengishagnaður vegna styrkingar krónunnar, umreiknaður
yfir í evrur. Áhrif hlutdeildarfélaga voru jákvæð um 1 m€. Hagnaður fyrir
tekjuskatt var 5 m€, en hagnaður ársins var 16 m€. Þessu veldur að
skattframtal er gert í íslenskum krónum og verður þar umtalsvert gengistap
vegna erlendra skulda, sem veldur skattafrádrætti. Að auki er 3 m€ færðar til
tekna vegna lækkunar á skatthlutfalli úr 18% í 15%. Hagnaður ársins 2007 var
20 m€.
Við samanburð á milli ára ber að hafa í huga að í byrjun árs 2007 varð
nettóhagnaður af sölu skipa að fjárhæð 7 m€.
Rekstur síðari helmings ársins 2008
Rekstrartekjur HB Granda hf. á síðari helmingi ársins 2008 námu 61 m€,
samanborið við 51 m€ árið áður. Rekstrarhagnaður fyrir afskriftir (EBITDA) var
19 m€ eða 30% af rekstrartekjum, en var 4 m€ eða 7% árið áður. Áhrif
fjáreignatekna og fjármagnsgjalda voru neikvæð um 9 m€, en um 12 m€ árið áður.
Áhrif hlutdeildarfélaga voru jákvæð um 1 m€, en óveruleg árið áður. Hagnaður
tímabilsins nam 5 m€, en á sama tíma árið áður varð 11 m€ tap.
Botnfiskskip félagsins veiddu mun meiri karfa en árið áður, en frystitogararnir
veiddu minni þorsk og ýsu. Uppsjávarskipin veiddu mun meiri norsk-íslenska
síld, en minni kolmunna. Þá varð mikil búbót af umtalsverðum makrílveiðum, sem
voru litlar árið áður. Síldveiðar voru svipaðar á milli ára, en mun minna
nýttist til manneldisvinnslu en árið áður. Afurðaverð í erlendri mynt lækkaði
heldur á milli ára, þó mismikið eftir fisktegundum og mörkuðum.
Efnahagur
Heildareignir félagsins námu 296 m€ í lok árs 2008. Þar af voru fastafjármunir
254 m€ og veltufjármunir 42 m€. Í árslok nam eigið fé 125 m€.
Eiginfjárhlutfall var 42%, en var 35% í lok árs 2007. Heildarskuldir félagsins
voru í árslok 171 m€.
Framvirkir gjaldmiðlasamningar
Viðskiptabankar félagsins hafa krafið félagið um uppgjör á framvirkum
gjaldmiðlasamningum að fjárhæð 3,0 m€ og er sú fjárhæð til varúðar færð til
skuldar á reikningum félagsins um áramót. Félagið telur þó að m.v. rétt
uppgjör sé fjárhæðin 1,6 m€ og hefur þegar greitt hluta hennar í samræmi við
það.
Skipastóll og afli
Í skipastól HB Granda hf. eru 5 frystitogarar, 3 ísfisktogarar og 4
uppsjávarfiskveiðiskip.
Á árinu 2008 var afli skipa félagsins 47 þúsund tonn af botnfiski og 126 þúsund
tonn af uppsjávarfiski.
Aðalfundur
Aðalfundur HB Granda verður haldinn föstudaginn 3. apríl 2009 í matsal
félagsins við Norðurgarð í Reykjavík og hefst klukkan 17:00. Stjórn félagsins
leggur til að greiddur verði 8% arður.
Fjárhagsdagatal
Aðalfundur 3. apríl 2009
Birting ársskýrslu 3. apríl 2009
Arðgreiðsludagur 27. apríl 2009
Hálfsársuppgjör 24.-28. ágúst 2009
Ársuppgjör 2009 8. - 12. mars 2010
