Atorka hefur eignast um 20% hlut í Shanghai Century Acquistion Corp (SHA) sem er skráð á AMEX markaðnum í New York. Heildarverð kaupanna er um 2 milljarðar króna og hafa kaupin átt sér stað á undanförnum vikum. Atorka fjármagnar kaupin með handbæru fé. SHA er félag sem er stofnað sérstaklega í þeim tilgangi að sameinast öðru félagi (e. Special Purpose Acquistion Corporation, SPAC) og hefur það samið um kaup á kínverska lyfjafyrirtækinu Sichuan Kelun Pharmceutical (Kelun) með fyrirvara um samþykki samkeppnisyfirvalda í Kína og er það ferli í hefðbundnum farvegi. Kelun er leiðandi fyrirtæki í framleiðslu og dreifingu á vökva í æð (IV solutions) í Kína. Fyrirtækið rekur 13 verksmiðjur í Kína, starfrækir þar 53 söluskrifstofur og er með með um 6.800 starfsmenn. Kelun framleiðir um 90 tegundir af vökvum og er heildarframleiðslugeta félagsins um 1.4 milljarðar skammta á ári. Félagið er einnig í framleiðslu á stungulyfjum og lausasölulyfjum (OTC). Fyrirséður er mikill vöxtur í heilbrigðisgeiranum í Kína á næstu árum og er Kelun með sterka stöðu til að taka þátt í þeim vexti. Atorka hefur einnig á undanförnum mánuðum keypt kauprétti í félaginu (e. warrants) sem eru nýtanlegir þegar kaupin á Kelun eru gengin í gegn. Um Atorku Atorka Group er fjárfestingarfélag sem er skráð í OMX Nordic Exchange á Íslandi. Atorka fjárfestir í traustum fyrirtækjum sem eru í atvinnugreinum sem hafa sérstök tækifæri til vaxtar á heimsmarkaði. Í fjárfestingum sínum leggur Atorka áherslu á að rekstur fyrirtækjanna sé öflugur með sterkt sjóðstreymi, sterkt stjórnendateymi, starfi við góð skilyrði til verulegs innri og ytri vaxtar og hafi tækifæri til verðmætaaukningar. Nánari upplýsingar veitir Magnús Jónsson forstjóri Atorku í síma 840 6240 og Valdís Arnardóttir kynningarstjóri 840 6217