Í dag 22. apríl 2009 var ársreikningur Stykkishólmbæjar 2008 tekinn til fyrri
umræðu. Eins og sveitarstjórnarlög kveða á um, skal fjalla um ársreikninginn á
tveimur fundum í sveitarstjórn. Seinni umræða verður 20. maí n.k.
Í reglugerð nr. 944/2000, um bókhald og ársreikninga sveitarfélaga, sem tók
gildi 1. janúar 2001, eru ákvæði um reikningsskil sveitarfélaga. Þar er gert
ráð fyrir að sveitarfélög hagi bókhaldi sínu og reikningsskilum í samræmi við
ákvæði laga um bókhald nr. 145/1994 og ársreikninga nr. 144/1994 að svo miklu
leyti sem sveitarstjórnarlög mæla ekki fyrir á annan veg eða reglugerðir settar
á grundvelli þeirra. Ársreikningar sveitarfélaga skulu byggðir á almennum
reikningsskilaaðferðum.
Ársreikningur Stykkishólmsbæjar fyrir árið 2008 byggir á sömu
reikningsskilaaðferðum og árið áður í samræmi við framangreind lög og reglur.
Helstu lykiltölur: Sjá viðhengi.
Rekstrartekjur sveitarfélagsins á árinu námu 719,7 millj. kr. samkvæmt
samanteknum ársreikningi fyrir A- bæjarsjóð og B- hluta stofnanir og fyrirtæki,
en þar af námu rekstrartekjur A-hluta þ.e. bæjarsjóðs 670,5 millj. kr.
Rekstrargjöld A og B hluta námu 849,3 millj. Þar af námu rekstrargjöld A-hluta
bæjarsjóðs 721,8 millj. að meðtöldum hækkunum vegna lífeyrisskuldbindinga
starfsfólks að upphæð 26,8 m.kr. Rekstrarniðurstaða bæjarsjóðs var neikvæð um
51,3 millj. samkvæmt ársreikningi en neikvæð um 129,6 millj. kr. í
samanteknum ársreikningi A og B hluta. Eigið fé sveitarfélagsins í árslok 2008
nam, eftir að lífeyrisskuldbindingar höfðu verið dregnar frá, 429,3 millj. kr.
samkvæmt efnahagsreikningi, en þar af nam eigið fé bæjarsjóðs 689,0 millj. kr.
Rekstarafkoma samantekins ársreiknings A og B hluta er
neikvæð um 129,6 millj. kr. Meginátæður eru fyrir þessu eru:
. Rekstrarniðurstaða bæjarsjóðs A-hluti var neikvæð um 51,3 millj. Helstu
ástæður þessarar rekstrarniðurstöðu má rekja til mikillar hækkunar
fjármagnskostnaðar vegna hækkunar á verðtryggðum lánum. Hækkun lánanna var
gjaldfærð í rekstrarreikningi m.v. stöðu þeirra í lok ársins.
. Tap af Fasteignum Stykkishólms (FSH ehf) upp á 10,9 milljónir króna að
stærstum hluta vegna hækkunar á verðtryggingum lána.
. Hallarekstur hafnarsjóðs var 11,4 millj.kr. og stafar að stærstum hluta
vegna hækkunar á verðtryggingum lána.
. Hallarekstur Fráveitu er 42,8 millj.kr. og skýrir aukin fjármagnskostnaður
vegna aukinnar verðbólgu þennan halla að mestu leiti.
. Hallrekstur Framkvæmdasjóðs er 13,3 milljónir kr. og stafar að stærstum
hluta vegna hækkunar á verðtryggingum lána.
Það sem er jákvætt við rekstur bæjarsjóðs A og B hluta er að handbært fé frá
rekstri er 93,2 millj.kr., ef ekki yrði farið í fjárfestingar og engin ný lán
tekin, þá tæki það ekki nema 9,9 ár að greiða upp allar skuldir bæjarsjóðs
Stykkishólmsbæjar.
Fjárfestingar voru 71,9 milljónir króna og vegur fjárfesting í gatnagerð
þyngst, auk þess voru fjárfestingar í íþróttamannvirkjum og lausamunum.
Álagningarhlutfall útsvars var 13,03%. Álagningarhlutfall fasteignaskatts var
0,43% á íbúðarhúsnæði.
Álagningarhlutfall á aðrar fasteignir var 1,65%. Ársreikningurinn í heild sinni
verður birtur á heimasíðu Stykkishólmbæjar.
Nánari upplýsingar veitir: Þór Örn Jónsson, bæjarritari, í síma 433-8100
