-Siglingar til og frá landinu raskast ekki. -Störfum 1.500 starfsmanna borgið Eimskip áformar að stofna nýtt fjárhagslega öflugt flutninga- og vörustjórnunarfyrirtæki. Nýtt og endurskipulagt Eimskip mun einbeita sér að kjarnastarfsemi sinni. • Fyrirætlanir þessar eru háðar samþykki lánardrottna Eimskips. Félagið mun leggja fram beiðni um nauðasamninga til héraðsdóms Reykjavíkur sem mun verða kynnt fyrir lánardrottnum. • Þetta mun ekki hafa áhrif á daglegan rekstur félagsins á sviði flutninga og vörustjórnunar. Greiðslur til birgja verða einnig með óbreyttum hætti. • Nýtt og endurreist félag verður að fullu í eigu lánardrottna Eimskips. Meðal þeirra er bandaríska fjárfestingarfélagið The Yucaipa Companies með um 32% eignarhlut sem jafnframt leggur félaginu til 15 milljónir evra. • Eimskip selur 49% hlutafjár í Versacold Atlas til Yucaipa, sem einnig hefur samið um kauprétt á 51% hlutafjár. • Eimskip hefur selt þrjú gámaskip sem gerð voru út frá Noregi. Eimskip mun óska eftir heimild til nauðasamninga. Eimskip Ísland ehf. verður í meirihlutaeigu íslenskra lánardrottna Eimskip hefur unnið með erlendum og innlendum ráðgjöfum frá því í október 2008 að fjárhagslegri endurskipulagningu félagsins. Gríðarleg skuldsetning félagsins reyndist óviðráðanleg. Sú staða er afleiðing nokkurra illa ígrundaðra fyrirtækjakaupa erlendis og þeirri staðreynd að háar ábyrgðir féllu á félagið. Samdráttaráhrif efnahagskreppunnar á mörkuðum innanlands og utan juku jafnframt vanda félagsins. Markmið stjórnar Eimskips er að hámarka endurgreiðslur til lánardrottna og tryggja áframhaldandi starfsemi á Íslandi og í Norður-Atlantshafi. Með þessu móti er einnig unnt að tryggja þau 1.500 störf sem nú eru hjá félaginu. Eitt fyrsta skrefið í endurskipulagningunni er að tryggja reksturinn á Íslandi með því að færa hluta starfseminnar yfir í dótturfélag Eimskips, Eimskip Ísland ehf. Það verður í byrjun að fullu í eigu móðurfélagsins. Með þessu móti er tryggt að daglegur rekstur og þjónusta á Íslandi raskast ekki og um leið er tryggt að greiðslur til birgja verða með eðlilegum hætti. Að sama skapi mun breytingin ekki að hafa áhrif á rekstur dótturfélaga Eimskips. Eimskip Ísland ehf. verður að fullu í eigu lánardrottna þar af í meirihlutaeigu íslenskra lánardrottna: • Landsbanki Íslands hf. mun eignast um 40% í félaginu og NBI um 5%. • Yucaipa breytir útistandandi veðtryggðum kröfum í hlutafé og fjárfestir jafnframt 15 milljónir evra í félaginu og eignast þannig um 32% í fyrirtækinu. • Ríflega fimmtíu aðrir lánardrottnar eignast 23% í Eimskip Íslandi ehf. Flestir þeirra eru íslenskir sjóðir og skuldabréfaeigendur, þ.m.t. nokkrir lífeyrissjóðir. • Núverandi hluthafar félagsins verða ekki í eigendahópi Eimskips Íslands ehf og fulltrúar nýrra eigenda munu skipa nýja stjórn þess eftir endurskipulagningu. Veðtryggðir lánardrottnar Eimskips, Yucaipa, skilanefnd Landsbankans og Íslandsbanki hf., styðja þessar tillögur. Skilanefnd Landsbankans og Íslandsbanki hf. hafa samþykkt að halda áfram fjármögnun sem lýtur að fasteignum Eimskips Íslands ehf. Eimskip mun nú leita eftir heimild til nauðasamninga og mun óveðtryggðum lánardrottnum gefast tækifæri til að kynna sér þessar tillögur. Að því loknu verða óveðtryggðir lánardrottnar beðnir um að greiða atkvæði. Reiknað er með að þetta ferli geti tekið 8 - 10 vikur og vonast er til að endurskipulagningu félagsins verði endanlega lokið á haustmánuðum. Óveðtryggðar kröfur eru um 45% af heildarkröfum í Hf. Eimskipafélag Íslands. Eimskip áætlar að óveðtryggðir lánardrottnar fái um 12% upp í kröfur sínar. Gert er ráð fyrir að heildarniðurstaðan verði sú að um 61% af öllum kröfum á félagið séu tryggar. Eimskip dregur sig út úr kæligeymslurekstri og lækkar rekstrarkostnað Eimskip hefur samið um sölu á 49% hlutafjár Versacold Atlas til Yucaipa og jafnframt veitt fyrirtækinu forkaupsrétt að 51%. Yucaipa er stór fjárfestingarsjóður sem sérhæfir sig í fjárfestingum í smásölu, vörustjórnun og flutningi matvæla. Stærsta kæligeymslufyrirtæki Bandaríkjanna, Americold, er í eigu Yucaipa. Söluferli Versacold Atlas hófst í september 2008 undir stjórn tveggja alþjóðlegra fjárfestingarbanka. Kauptilboð sem bárust voru mun lægri en vonir stóðu til og í raun óásættanleg, enda hefðu þau ekki dugað til að greiða niður skuldir félagsins sem stofnað var til við kaupin. Yucaipa, sem gerði tilboð í upphaflega ferlinu, lýsti áhuga á þátttöku í endurskipulagningu Eimskips meðal annars til að liðka fyrir sölunni á Versacold Atlas. Yucaipa hefur yfirtekið 120 milljón evra lán ABN Amro sem hvíldi á Eimskip, sem undanfara að yfirtöku á Versacold Atlas. Yucaipa skipti hluta af ABN Amro láninu fyrir 49% hlut í Versacold Atlas og hefur eins og fyrr segir forkaupsrétt að því hlutafé sem eftir stendur. Loks hefur Eimskip selt þrjú gámaskip í Noregi til Atlantica Shipping og greitt niður skuldir um 30 milljónir evra. Vegna sölunnar á Versacold Atlas mun Eimskip færa niður eignarhlut sinn í félaginu upp á 176 milljónir evra. Næstu skref Beiðnin um nauðasamninga markar mikilvægan áfanga í fjárhagslegri endurskipulagningu Eimskips. Í framhaldinu stefnir stjórn félagsins að afskráningu hlutabréfa Eimskips í Kauphöll Íslands. Verði nauðasamningar samþykktir lækka vaxtaberandi heildarskuldir samstæðunnar úr um 1,600 milljónum evra í um 100 milljónir evra í hinu nýja fyrirtæki. Í kjölfarið mun traustur efnahagsreikningur Eimskip Ísland ehf tryggja félaginu og samstæðufyrirtækjum þess heilbrigðan rekstur. Gylfi Sigfússon, forstjóri Hf. Eimskipafélags Íslands: „Ég tel þetta vera lífsnauðsynlegt skref í ferli sem miðar að endurreisn Eimskips og að drög að nauðasamningum bjóði upp á bestu fáanlegu útkomu fyrir alla lánardrottna samstæðunnar. Ég vona að lánardrottnar okkar verði á sama máli og greiði atkvæði með þessum drögum sem munu gefa Eimskip fjárhagslegan styrk til að takast á við efnahagslega erfiðleika og leggja grundvöll að virðisaukningu í framtíðinni. Það er mér sérstök ánægja að tilkynna aðild Yucaipa að Eimskip því ég tel að stuðningur erlends fjárfestingarsjóðs við íslenskt fyrirtæki sé mjög jákvætt skref fyrir hagkerfi okkar í heild og sýni að erlendir fjárfestar eru reiðubúnir að fjárfesta á Íslandi. Yucaipa er ekki einungis fjárfestir heldur samstarfsaðili sem mun leggja til rekstrarlega sérþekkingu og valkosti við stefnumótun fyrir endurreista starfsemi okkar. Við hlökkum til að kanna valkosti fyrir Eimskip og önnur félög í eignasafni Yucaipa til að virkja augljós tækifæri til samvinnu milli þeirra í sambandi við kæligeymslu- og frystigámarekstur. Eftir sem áður mun meginverkefni okkar vera þjónusta fyrir Ísland, Norður Atlantshafssvæðið, Færeyjar og Noreg. Á síðustu sex mánuðum höfum við unnið af krafti við að minnka afkastagetu og aðlaga umfang starfseminnar að minni eftirspurn á öllum sviðum. Starfsfólk okkar hefur einnig sýnt mikla óeigingirni og fórnfýsi á þessum erfiðu tímum og kann ég því miklar þakkir fyrir. Ég vil undirstrika að nauðasamningsferlið mun væntanlega ekki hafa nein áhrif á daglegan rekstur Eimskips, hvorki á Íslandi né erlendis, og ég hvet hvern þann sem óttast að reyndin kunni að verða önnur að hafa samband við okkur og ræða málin. Sameiginlegt markmið okkar er að sjá til þess að rekstrartruflanir verði sem allra minnstar ef nokkrar. Lánardrottnar hafa veitt Eimskip ómetanlegan stuðning síðustu mánuðina. Ég þakka þeim stuðninginn og vona að þeir séu sammála stjórninni og stjórnunarteyminu að þessar tillögur bjóða upp á besta valkostinn í stöðunni fyrir alla lánardrottna. Það er augljóslega ákjósanlegasta niðurstaðan fyrir alla sem vilja sjá Eimskip vinna sig út úr mótbyrnum og gegna áfram lykilhlutverki í endurreisn íslenska hagkerfisins.“