Marel 3F 2021: Áframhaldandi meðbyr í pöntunum, afhending til viðskiptavina tryggð með auknum tilkostnaði

Marel kynnir afkomu þriðja ársfjórðungs 2021 (allar upphæðir eru í evrum)

• Sterkar mótteknar pantanir hafa leitt til stöndugrar og vel samsettrar pantanabókar. Góður ársfjórðungur í alifuglaiðnaði- og fiskiðnaði en lægri pantanir í kjötiðnaði.
• Auking fjárfesting í markaðssókn, nýsköpun og innviðum til að mæta væntum tekjuvexti.
• Marel hefur markvisst byggt upp öryggisbirgðir af varahlutum og íhlutum til framleiðslu. Sjóðstreymi frá rekstri var gott að teknu tilliti til aukinnar fjármagnsbindingar í birgðum.
• Rík áhersla lögð á afhendingaröryggi, en áfram þrýstingur á framlegð sökum áskorana í framleiðslu og flutningum. Í ársfjórðungnum hækkaði Marel verð á vörum og þjónustu um 4-6% til að mæta auknum kostnaði.

Helstu atriði í afkomu þriðja ársfjórðungs 2021 (3F21):

• Pantanir námu 360,6 milljónum evra (3F20: 282,5m).
• Pantanabókin¹ stóð í 527,8 milljónum evra (3F20: 434,3m).
• Tekjur námu 331,9 milljónum evra (3F20: 287,2m).
• EBIT² nam 36,0 milljónum evra (3F20: 44,1m), sem var 10,8% af tekjum (3F20: 15,4%).
• Hagnaður nam 23,2 milljónum evra (3F20: 29,4m).
• Hagnaður á hlut (EPS) var 3,10 evru sent (3F20: 3,93 evru sent).
• Handbært fé frá rekstri fyrir fjármagnsliði og skatta nam 19,7 milljónum evra (3F20: 54,1m). Markviss uppbygging öryggisbirgða af íhlutum til framleiðslu og varahlutum í fjórðungnum nam 26,0 milljónum evra. Frjálst sjóðstreymi nam 0,1 milljónum evra(3F20: 36,6m).
• Skuldahlutfall (nettó skuldir/EBITDA) var 0,9x í lok september (2F21: 0,8x, 3F20: 0,5x).

Helstu atriði í afkomu janúar - september 2021 (9M21)

• Pantanir námu 1.101,3 milljónum evra (9M20: 914,4m).
• Tekjur námu 993,4 milljónum evra (9M20: 894,5m).
• EBIT² nam 112,6 milljónum evra (9M20: 114,5m), sem var 11,3% af tekjum (9M20: 12,8%).
• Hagnaður nam 67,7 milljónum evra (9M20: 73,5m).
• Hagnaður á hlut (EPS) var 9,05 evru sent (9M20: 9,75 evru sent).
• Handbært fé frá rekstri fyrir fjármagnsliði og skatta nam 157,8 milljónum evra (9M20: 178,7m).
• Frjálst sjóðstreymi nam 100,2 milljónum evra (9M20: 122,8m).
  
  

¹ Að meðtalinni pantanabók Curio og PMJ, að fjárhæð 4,2 milljónir evra í 1F21. ² Rekstrarniðurstaða aðlöguð fyrir afskrift á óefnislegum eignum sem tengjast yfirtökum (PPA). Frá og með fjórða ársfjórðungi 2020 er einnig aðlagað fyrir kostnaði tengdum yfirtökum.

Ítarlegri umfjöllun um rekstur og afkomu félagsins má finna í enskri útgáfu fréttatilkynningarinnar (íslenska útgáfan veitir aðeins yfirlit yfir helstu þætti uppgjörsins, horfur, fjárfestafund og fjárhagsdagatal).

Árni Oddur Þórðarson, forstjóri:

„Heimsfaraldurinn hefur haft varanleg áhrif á virðiskeðju matvæla þar sem sjálfvirknivæðing, róbótatækni og rafrænar lausnir leiða framþróun sjálfbærrar matvælavinnslu. Skortur á vinnuafli, launaskrið og krafa um fjarlægðarmörk á vinnustöðum ýta undir auknar fjárfestingar. Með stöðugri nýsköpun hefur Marel undanfarið kynnt fjölda nýrra lausna sem styðja vel við aukna samkeppnishæfni viðskiptavina okkar. Í núverandi markaðsumhverfi skiptir lykilmáli að búa yfir snerpu og sveigjanleika til að svara ákalli neytenda um öruggar gæðavörur sem eru framleiddar á sjálfbæran hátt og henta fyrir mismunandi dreifileiðir í gegnum netverslun, veitingarekstur og hefðbundna stórmarkaði.

Á þremur síðustu ársfjórðungum hafa pantanir náð nýjum hæðum. Pantanir á þriðja ársfjórðungi námu 361 milljónum evra og samanlagðar pantanir fyrir fyrstu níu mánuði ársins jukust um 20% á milli ára. Sérstaklega áttu alifuglaiðnaður og laxaiðnaður góðu gengi að fagna í fjórðungnum þar sem viðskiptavinir eru að tryggja sér nýjar framleiðslulínur með framsæknum róbótum, skurðarlausnum og skynjaratækni auk margvíslegra hugbúnaðarlausna. Við höfum væntingar um góða áframhaldandi þróun í pöntunum, þar sem söluverk í vinnslu eru enn að vaxa þvert á iðnaði og landsvæði og við horfum því bjartsýn fram á veginn.

Við höfum siglt nokkuð stöðugt í gegnum heimsfaraldurinn en enn gætir áhrifa af áskorunum tengdum aðfangakeðju, auknum flutningskostnaði og verðbólgu í hrávörum. Til að mæta þessum áskorunum höfum við lagt áherslu á aukna vöruþróun, aukið markaðs- og sölustarf á lykilmörkum og lagt allt kapp á að tryggja afhendingu á vörum okkar og þjónustu á réttum tíma til viðskiptavina. Tekjur í fjórðungnum voru 332 milljónir evra með 11% rekstrarframlegð, sem er töluvert undir sögulegri afkomu og markmiðum okkar. Til að mæta auknum kostnaði hækkuðum við verð á vöru og þjónustu um 4-6% í fjórðungnum sem mun smám saman skila sér í auknum tekjum. Við höfum nýtt sterkan efnahag félagsins til að bæta enn í vöru- og íhlutabirgðir til að mæta áskorunum í aðfangakeðju og tryggja að matvælakeðjan haldist gangandi. Sjóðstreymi er firnasterkt það sem af er ári þrátt fyrir verulega aukningu á birgðum.

Í ljósi sterkrar pantanastöðu og hagstæðrar samsetningar eftir iðnuðum og vöruflokkum gerum við ráð fyrir hærri tekjum og rekstarframlegð á komandi fjórðungum. Við stöndum við markmið okkar um 16% EBIT fyrir árslok 2023.”

Helstu tölur uppgjörsins

¹ Operating income adjusted for PPA related costs, including depreciation and amortization, and as of Q4 2020, acquisition related costs. ² Including acquired order book of Curio and PMJ of EUR 4.2m in 1Q21. ³ Trade receivables, inventories, net contract assets & contract liabilities, trade payables. ⁴ Net results (annualized) / average of total equity.   ⁵ Net debt (Including lease liabilities) / LTM EBITDA.

Fjárfesting í áframhaldandi vexti

Til að þjóna þörfum viðskiptavina Marel enn betur til framtíðar og nýta vaxtartækifæri í breytilegum markaðsaðstæðum, er gert ráð fyrir að fjárfestingar í rekstrarfjármunum aukist um sem nemur 200 punkta hækkun næstu fjögur árin.

Marel er áreiðanlegur þjónustuaðili og aukin áhersla verður lögð á sjálfvirknivæðingu og stafrænar lausnir í allri umsýslu með varahluti til að tryggja skamman afhendingartíma og sveigjanleika gagnvart breytilegri samsetningu pantanabókar.

Marel sér jafnframt tækifæri í aukinni fjárfestingu í sölu og þjónustu til viðskiptavina á vaxtarmörkuðum, fjárfestingu í þróun stafrænna lausna, hagræðingu í framleiðslu og á stoðsviðum, sem og aukinni sjálfvirkni og stafrænni þróun í framleiðslu og þjónustuneti félagsins.

Marel býður á röð fjárfestadaga Marel 360°

Fjárfestadagur Marel verður með nýju sniði í ár, en markaðsaðilum er boðið á röð viðburða sem saman gefa 360° sýn á Marel. Dagskrá Marel 360° viðburðanna samanstendur af rafrænni heimsókn í höfuðstöðvar Marel á Íslandi og hlaðvarpsþáttum með viðtölum við lykilstarfsmenn auk fjögurra netviðburða sem snúa að fjórum lykilþáttum í stefnu Marel til framtíðar. Fjallað verður um Marel sem vaxtarfyrirtæki, einstakt sölu- og þjónustunet félagins um heim allan, nýjungar í hugbúnaðarlausnum og aukna áherslu á sjálfbærni í matvælaframleiðslu og rekstri félagsins.

Viðburðirnir munu hefjast kl. 14:00 og standa yfir í allt að 90 mínútur hver um sig. Fjölbreytt úrval fyrirlesara og pallborðsumræður verða í beinni útsendingu svo ekki gleyma að taka frá dagana:

• 7. október: Rafræn heimsókn í Marel á Íslandi (upptaka aðgengileg á marel.com/ir)
• 11. nóvember: Vöxtur (e. growth)
• 18. nóvember: Alþjóðlegt sölu- og þjónustunet (e. global reach)
• 2. desember: Stafrænt ferðalag (e. digitalization)
• 9. desember: Sjálfbærni (e. sustainability)
  
  

Horfur

Markaðsaðstæður hafa verið krefjandi í ljósi umróts á heimsmörkuðum og yfirstandandi COVID-19 heimsfaraldurs. Marel býr að góðri dreifingu tekna á milli markaða og iðnaða í gegnum alþjóðlegt sölu- og þjónustunet sitt ásamt breiðu og framsæknu vöru- og þjónustuframboði. Sem stendur er ekki vitað hver fjárhagsleg áhrif COVID-19 munu verða á Marel.

Marel stendur við vaxtarmarkmið sín til meðallangs- og langs tíma.

Marel stefnir að um 40% framlegð (e. gross profit), 18% sölu-, markaðs- og stjórnunarkostnaði og 6% þróunarkostnaði, til meðallangs tíma.

Marel stefnir að 12% meðalvexti árlega yfir tímabilið 2017-2026 sem byggir á öflugri markaðssókn og nýsköpun, samstarfi við lykilaðila og yfirtökum á fyrirtækjum.

• Marel gerir ráð fyrir að almennur markaðsvöxtur nemi 4-6% til lengri tíma. Með sterkri markaðssókn og nýsköpun stefnir Marel að innri vexti umfram almennan markaðsvöxt.
• Gera má ráð fyrir að áframhaldandi traustur rekstur og sterkt sjóðstreymi geti stutt við 5-7% ytri meðalvöxt á ári.
• Marel gerir ráð fyrir að hagnaður á hlut vaxi hraðar en tekjur.
  
  

Áætlaður vöxtur er háður hagsveiflum og þeim tækifærum sem eru í boði hverju sinni og því má gera ráð fyrir að hann verði ekki línulegur. Reikna má með breytilegri afkomu á milli ársfjórðunga vegna efnahagsþróunar, sveifla í pöntunum og tímasetningu stærri verkefna.

Afkomuefni

Ítarlegri umfjöllun um rekstrarafkomu má finna í enskri útgáfu fréttatilkynningar sem er í viðhengi. Sé misræmi á milli uppgjörstilkynninga félagsins á íslensku annars vegar og ensku hins vegar, skal enska útgáfan gilda þar sem tilkynningar eru þýddar af ensku yfir á íslensku.

Rafrænn afkomufundur með markaðsaðilum

Fimmtudaginn 21. október 2021 kl. 8:30 verður haldinn afkomufundur fyrir fjárfesta og markaðsaðila. Fundurinn verður eingöngu rafrænn en þar munu Árni Oddur Þórðarson forstjóri og Linda Jónsdóttir fjármálastjóri kynna afkomu félagsins og helstu atriði úr rekstri á þriðja ársfjórðungi.

Fundinum verður vefvarpað beint á www.marel.com/webcast og upptaka verður aðgengileg á www.marel.com/ir eftir fundinn.

Markaðsaðilar geta einnig hringt inn á fundinn:

• IS: +354 800 7437 (PIN 58395655#)
• NL: +31 107129162
• UK: +44 33 3300 9267
• US: +1 631 913 1422 (PIN 58395655#)

Fjárhagsdagatal

Marel mun birta árshluta- og ársuppgjör félagsins samkvæmt neðangreindu fjárhagsdagatali:

• 4F 2021 – 2. febrúar 2022
  
  

Birting fjárhagsupplýsinga mun eiga sér stað eftir lokun markaðar. Vinsamlegast athugið að dagsetningarnar eru birtar með fyrirvara um breytingar.

Fjárfestatengsl

Nánari upplýsingar veita Fjárfestatengsl Marel í gegnum netfangið IR@marel.com og í síma 563 8001. 

Samskiptasvið

Fjölmiðlafyrirspurnir skulu sendar á samskiptasvið Marel í gegnum netfangið globalcommunications@marel.com og í síma 563 8200.

Um Marel

Marel (NASDAQ: MAREL; AEX: MAREL) er í fararbroddi á heimsvísu í þróun og framleiðslu tækja, heildarlausna, hugbúnaðar og þjónustu fyrir matvælavinnslu á kjúklingi, kjöti og fiski. Hjá Marel starfa nú um 7.000 manns í yfir 30 löndum, þar af um 720 á Íslandi. Marel velti 1.238 milljónum evra árið 2020, en árlega fjárfestir félagið um 6% af veltu í nýsköpun og vöruþróun sem styður við aukna hagkvæmni, öryggi og sjálfbærni í matvælavinnslu. Félagið var stofnað 1983, skráð í Kauphöll Íslands árið 1992, og tvíhliða skráð í Euronext kauphöllina í Amsterdam árið 2019.

Athygli fjárfesta er vakin á eftirfarandi:

Sumar staðhæfingar í þessari fréttatilkynningu kunna að vera byggðar á mati og áætlunum stjórnenda félagsins en ekki á staðreyndum sem hægt er að sannreyna við birtingu hennar. Í eðli sínu fela slíkar staðhæfingar því í sér óvissu. Við vekjum þess vegna athygli fjárfesta á því að margir þættir geta haft þau áhrif að rekstrarumhverfi og afkoma verði með öðrum hætti en forsendur gera ráð fyrir í þessari tilkynningu. Tilkynningin verður ekki endurskoðuð eftir birtingu hvað þetta varðar.

Gögn um markaðshlutdeild

Yfirlýsingar um markaðshlutdeild, þar með taldar þær sem varða samkeppnisstöðu Marel, byggjast á utanaðkomandi heimildum og gögnum, svo sem gögnum frá rannsóknastofnunum, iðnaðar- og sölunefndum og hópum, ásamt mati stjórnenda Marel. Séu upplýsingar ekki tiltækar fyrir Marel kunna slíkar yfirlýsingar að vera byggðar á áætlunum og mati utanaðkomandi aðila og/eða stjórnenda. Markaðsstaða er byggð á sölutölum nema annað sé tekið fram.

Viðhengi

• Marel Q3 2021 Condensed Consolidated Interim Financial Statements (Excel)
• Marel Q3 2021 Condensed Consolidated Interim Financial Statements
• Marel Q3 2021 Press Release