Flugfélagið PLAY flutti 122.217 farþega í apríl 2024, sem er 19% meira en í apríl 2023 þegar PLAY flutti 102.499 farþega. Sætanýtingin í apríl 2024 var 85,1%, sem er aukning frá apríl í fyrra þegar sætanýting var 80,8%. Þessi aukning er eftirtektarverð þegar litið er til þess að aukning í framboðnum sætiskílómetrum var 16% á milli ára og að páskarnir voru í mars á þessu ári, en apríl í fyrra.
Af þeim farþegum sem flugu með PLAY í apríl voru 30% á leið frá Íslandi, 27% voru á leið til Íslands og 43% voru tengifarþegar (VIA). Stundvísi PLAY var með besta móti í aprílmánuði, eða 89,4%.
Borgaráfangastaðir í Evrópu héldu áfram að mælast vel fyrir í leiðakerfi PLAY. London, Alicante, Kaupmannahöfn, París og Berlín voru með yfir 90% sætanýtingu.
Nýr áfangastaður í apríl
PLAY hóf miðasölu til Cardiff í Wales í aprílmánuði. Flugfélagið mun fljúga tvisvar í viku til Cardiff yfir sex vikna tímabil næstkomandi haust. Fyrsta flugið verður 10. október og síðasta flugið 20. nóvember. Það sem af er ári hefur PLAY kynnt fjóra nýja áfangastaði til viðbótar við Cardiff en þeir eru Madeira, Marrakesh, Vilníus og Split.
Einar Örn Ólafsson, forstjóri PLAY:
„Það er ánægjulegt að sjá þennan vöxt í farþegafjölda og sætanýtingu, sem er til marks um aukið framboð og sterkari stöðu PLAY á erlendum mörkuðum. Að ná þessum vexti samhliða 16% aukningu í framboðnum sætiskílómetrum er vel að verki staðið og sýnir að við erum á réttri leið og í góðri stöðu til að gera enn betur. Enn á ný státum við af frábærri stundvísi, 89,4%, sem er umfram markmið okkar um 85% stundvísi yfir allt árið. Við erum sem fyrr virkilega stolt af samstarfsfólki okkar sem nær að skila þessum frábæru tölum og ég er handviss um að áframhald verði á því. Við hjá PLAY bíðum spennt eftir sumarvertíðinni og erum staðráðin í að veita farþegum okkar frábæra þjónustu á góðu verði.“
Viðhengi
