Ársreikningur Reykjavíkurborgar árið 2024 var lagður fyrir borgarráð í dag 2. maí og vísað til fyrri umræðu í borgarstjórn þann 6. maí næstkomandi.
A- og B-hluti
Rekstrarniðurstaða A- og B-hluta var jákvæð um 10,7 ma.kr. sem var 14,1 ma.kr. betri niðurstaða en árið 2023. Rekstrarniðurstaða fyrir fjármagnsliði og afskriftir (EBITDA) nam 63,0 ma.kr. sem var um 15,4 ma.kr. betri niðurstaða en árið 2023. EBITDA í hlutfalli af tekjum var 23% og hækkar um 4%-stig milli ára.
Rekstrarniðurstaða A- og B-hluta var 3,0 ma.kr. betri en áætlað var og EBITDA var 6,2 ma.kr. umfram áætlanir. Faxaflóahafnir, Orkuveita Reykjavíkur, Slökkvilið höfuðborgarsvæðisins og Strætó, ásamt A-hluta borgarinnar skiluðu öll betri niðurstöðu en gert hafði verið ráð fyrir. Vegur þyngst afkoma A-hluta sem var 4,0 ma.kr. betri en áætlað var. Afkoma Orkuveitu Reykjavíkur var 2,9 ma.kr. umfram áætlanir og afkoma Faxaflóahafna var 815 m.kr. umfram. Afkoma Félagsbústaða var undir áætlun þar sem matsbreytingar fjárfestingaeigna voru lægri en forsendur gerðu ráð fyrir en EBITDA félagsins var hins vegar sterkari en áætlað hafði verið. Afkoma SORPU var undir áætlun sem má rekja til afskrifta umfram áætlanir.
Skuldaviðmið A- og B-hluta án Orkuveitu Reykjavíkur lækkar milli ára og var 104% í árlok 2024 en var 110% árið 2023. Þá var jafnvægisviðmiðið án Orkuveitu Reykjavíkur jákvætt um 4,0 ma.kr. Ákvæði í reglugerð 502/2012 um að undanskilja skuli veitu- og orkufyrirtæki við útreikning á jafnvægis- og skuldaviðmiði hefur verið framlengt til ársloka 2029.
Heildareignir A- og B-hluta samkvæmt samanteknum efnahagsreikningi 31. desember 2024 námu 978,8 ma.kr. og heildarskuldir ásamt skuldbindingum námu 525,0 ma.kr. Eigið fé nam 453,8 ma.kr. en þar af nam hlutdeild minnihluta 17,7 ma.kr. Eiginfjárhlutfall A- og B-hluta í árslok nam 46,4% en var 46,9% í árslok 2023. Eigið fé A- og B-hluta hækkaði um 16,8 ma.kr. milli ára sem má rekja til jákvæðrar rekstrarniðurstöðu, endurmats á framleiðslu- og dreifikerfi Orkuveitu Reykjavíkur og hækkunar lóðamats sem skatttekjur reiknast af hjá A-hluta.
Veltufé frá rekstri jókst um 4,6 ma.kr. og nam 40,3 ma.kr. eða 14,5% í hlutfalli af tekjum. Fjárfestingar (brúttó) námu 58,1 ma.kr. eða 20,9% í hlutfalli af tekjum. Lántaka og ný stofnframlög námu 51,8 ma.kr. og afborganir lána og leiguskulda námu 32,5 ma.kr.
A-hluti
Rekstrarniðurstaða A-hluta á árinu 2024 var jákvæð um 4,7 ma.kr. sem var 9,7 ma.kr betri niðurstaða en árið 2023. Rekstrarniðurstaða fyrir fjármagnsliði og afskriftir (EBITDA) var jákvæð um 18,2 ma.kr. sem var um 10,2 ma.kr. betri niðurstaða en fyrir ári síðan.
Jákvæðan viðsnúning í rekstri A-hluta má meðal annars rekja til þess að tekjur jukust um 10,2% á meðan rekstrargjöld jukust aðeins um 7,6% án afskrifta og breytinga á gjaldfærslu lífeyrisskuldbindinga. Þá lækkar lífeyrisskuldbinding A-hluta á milli ára og skilaði tekjufærslu að fjárhæð 847 m.kr. og nemur jákvætt frávik um 2,9 ma.kr. Fjárhagsáætlanir gengu að öðru leyti að mestu eftir.
Skuldaviðmið A-hluta í árslok 2024 var 77% og lækkaði um 5%-stig á milli ára.
Tekjur A-hluta námu 194,5 ma.kr. hækkuðu um 18,0 ma.kr. milli ára og voru 2,6 ma.kr. yfir áætlun. Rekstrargjöld A-hluta með afskriftum námu 185,9 ma.kr. og hækkuðu um 8,6 ma.kr. milli ára en voru 230 m.kr. undir fjárheimildum.
Breyting lífeyrisskuldbindingar var til lækkunar og nam tekjufærsla 846 m.kr. en í áætlun var gert ráð fyrir 2,1 ma.kr. gjaldfærslu. Góð ávöxtun var af eignum R-deildar Brúar lífeyrissjóðs leiddi til að tryggingarfræðileg skuldbinding lækkaði um 2,3 ma.kr. Í desember voru undirritaðir nýir kjarasamningar sem voru fyrir utan tryggingarfræðilega matið. Þar sem þessar launahækkanir tilheyrðu árinu 2024 voru áhrifin á skuldbindinguna metin og gerð varúðargjaldfærsla upp á 1,2 ma.kr. í ársreikningi. Gjaldfærsla A-deildar Brúar lífeyrissjóðs nam 209 m.kr.
Rekstrarniðurstaða A-hluta fyrir afskriftir og fjármagnsliði (EBITDA) í hlutfalli af tekjum var 9,3% en hún var 4,5% árið áður. Fjármagnsliðir voru neikvæðir um 3,8 ma.kr. eða 1,2 ma.kr. lægri en áætlað var sem skýrist bæði af hærri vaxtatekjum og lægri verðbóta- og vaxtagjöldum. Arður af eignarhlutum nam 5,7 ma.kr. og var á pari við áætlun.
Heildareignir A-hluta samkvæmt námu í lok árs samtals 292,2 ma.kr. og heildarskuldir ásamt skuldbindingum voru 203,6 ma.kr. Eigið fé A-hluta nam 88,6 ma.kr. í lok árs og hækkaði um 7,4 ma.kr. á árinu. Eignfjárhlutfall A-hluta nam 30% en var 29% í árslok 2023.
Veltufé frá rekstri nam 12,2 ma.kr. og var 6,3% í hlutfalli af tekjum. Brúttó fjárfestingar námu 20,7 ma.kr. og drógust saman um 5,1 ma.kr. milli ára. Lántaka ársins nam 16,2 ma.kr. og lækkaði milli ára um 4,6 ma.kr. Afborganir langtímalána og leiguskulda námu 13,3 ma.kr. á árinu en voru 6,4 ma.kr. hærri en árið áður vegna uppgreiðslu skammtímaláns frá árinu 2021 sem nam 4,8 ma.kr.
Á árinu gerði Reykjavíkurborg samning við Þróunarbanka Evrópuráðsins (CEB) um lán að fjárhæð 100 milljónum evra til fjármögnunar á viðhaldsátaki í húsnæði grunnskóla, leikskóla og frístundar. Í lok árs var dregið á lánið 16 milljónir evra eða 2,3 ma.kr. Lánið er til 20 ára með breytilegum vöxtum. Í árslok er samsvarandi fjárhæð á bankareikningi í evrum.
Stöðugildi A-hluta voru að meðaltali 8.606 á árinu 2024 og breyttist óverulega frá árinu 2023. Samanlagður fjöldi stöðugilda A-hluta og B-hluta skv. ábyrgðarhluta Reykjavíkurborgar 2024 var 9.760. Íbúar Reykjavíkurbogar voru skv. Þjóðskrá Íslands 145.931 þann 1. desember 2024 og fjölgaði um 1,8% frá sama tíma árið 2023.
Efnahagslegt rekstrarumhverfi
Ytra rekstrarumhverfi Reykjavíkurborgar hefur síðastliðin ár einkennst af þenslu á vinnumarkaði, þrálátri verðbólgu og háum vöxtum. Á árinu 2024 tók verðbólga að hjaðna og mældist 4,8% í desember. Samhliða því hóf Seðlabanki Íslands að lækka stýrivexti, sem stóðu í 8,5% í árslok. Þróun næstu missera ræðst að mestu af því hversu vel gengur að ná niður verðbólgu og vöxtum án þess að kæla hagkerfið um of. Á árinu voru kjarasamningar lausir. Samið hefur verið til langs tíma við stóran hluta vinnumarkaðarins en sveitarfélögin studdu myndarlega við kjarasamninga með lækkun gjaldskráa og þátttöku í gjaldfrjálsum skólamáltíðum. Blikur eru á lofti í alþjóðlegum efnahagsmálum, bæði vegna tollaáætlana og stríðsátaka. Mikil óvissa ríkir um hvaða áhrif þessir þættir muni hafa á innlent hagkerfi.
***
Með 13. gr. laga nr. 25/2020 og 2. gr. laga nr. 22/2021 hefur Alþingi vikið til hliðar fjármálareglum sveitarfélaga skv. ákvæði 64. gr. sveitarstjórnarlaga til loka árs 2025. Var það gert til að liðka fyrir möguleikum sveitarfélaganna að grípa til viðspyrnu og sóknar í stað samdráttaraðgerða vegna áhrifa kórónuveirufaraldursins. Undanskilja skal veitu- og orkufyrirtæki við útreikning á jafnvægis- og skuldaviðmiði til ársloka 2029 samanber reglugerð 1195/2024.
Rekstur Reykjavíkurborgar skiptist í A-hluta og B-hluta. Til A-hluta telst starfsemi sem að hluta eða öllu leyti er fjármögnuð með skatttekjum. Um er að ræða Aðalsjóð, sem heldur utan um rekstur fagsviða og Eignasjóð. Til B-hluta teljast fjárhagslega sjálfstæð fyrirtæki sem að hálfu eða meirihluta eru í eigu Reykjavíkurborgar, en rekstur þeirra er að stofni til fjármagnaður með þjónustutekjum. Fyrirtækin eru: Orkuveita Reykjavíkur, Faxaflóahafnir sf., Félagsbústaðir hf., Íþrótta- og sýningahöllin hf., Malbikunarstöðin Höfði hf., Slökkvilið höfuðborgarsvæðisins bs., Sorpa bs. og Strætó bs, auk Aflvaka hf., Jafnlaunastofu sf. og Þjóðarleikvangs ehf.
Reykjavík, 2. maí 2025.
Nánari upplýsingar veitir
Halldóra Káradóttir sviðsstjóri fjármála- og áhættustýringarsviðs
halldora.karadottir@reykjavik.is
Viðhengi
- Ársreikningur Reykjavíkurborgar 2024
- Skýrsla fjármála- og áhættustýringarsviðs með ársreikningi 2024
- Reykjavíkurborg - FRÉTTATILKYNNING TIL KAUPHALLAR_2025-05-02
